Roboceir
Llwyddodd pobl ifanc i drawsnewid sgrap a’i droi yn ‘robocars’ ac yna ysgrifennwyd rap am eu creadigaethau rhyfeddol mewn prosiect a gynhaliwyd drwy Lyfrgelloedd Rhondda Cynon Taf.
Cyfarfu mwy na 80 o fechgyn ifanc yn lleoliad Valleys Kids ym Mhenygraig i rasio’r cerbydau model a adeiladwyd allan o ddeunyddiau sgrap.
Roedd y digwyddiad yn ddiweddglo i brosiect llythrennedd a gyllidwyd gan Basic Skills Cymru, lle bu’r bechgyn yn ymchwilio i geir a robotiaid yn llyfrgell yr ysgol, ac yn dylunio a gwneud y modelau yn ystod gweithdai a arweiniwyd gan gwmni addysg gwyddoniaeth a leolir yn Abertawe, XLWales.
Wedi i’r modelau gael eu hadeiladu, gweithiodd y bechgyn gyda’r rapiwr Jon Chase a’r cerddor Geraint Brown i ysgrifennu caneuon rap yn disgrifio eu creadigaethau.
Hwn oedd y prosiect diweddaraf yn y cynllun Darllen Miliwn o Eiriau Gyda’n Gilydd yng Nghymru a anelir at annog bechgyn yn eu harddegau i ddarllen. Fe’i trefnir gan Lyfrgelloedd Rhondda Cynon Taf mewn partneriaeth gydag Adran Addysg yr Awdurdod.
Enillwyd Y Sialens Robocar gan The Killer, a adeiladwyd gan Connor a Rhys o Ysgol Gyfun Blaengwawr, Aberaman.
Meddai’r Aelod Cabinet dros Ddiwylliant a Hamdden, Cyngor Rhondda Cynon Taf, y Cyng. Robert Bevan: “Mae ein Gwasanaeth Llyfrgelloedd yn cynnig ystod o gyfleoedd i bobl o bob oed fod yn greadigol drwy gydol y flwyddyn ac rwy’n falch fod y prosiect ieuenctid hwn wedi bod yn gymaint o lwyddiant!”
Gall fod yn aelod o holl lyfrgelloedd Rhondda Cynon Taf am ddim ac mae croeso i bawb sy’n byw neu yn gweithio o fewn y fwrdeistref sirol i ymuno. Ceir wybodaeth pellach drwy ymweld â http://www.rhondda-cynon-taff.gov.uk/cy/hafan.aspx
