ShoutTawe

Gwybodaeth » Addysg » Yn Yr Ysgol 11-16 - Cyflwyniad » Gwaharddiad

• Mae gwaharddiad neu gael eich gwahardd o’r ysgol yn golygu bod yr ysgol yn gorchymyn na fedrwch chi fynychu’r ysgol.
  
• Gall y Pennaeth wahardd disgybl sy’n torri rheol ysgol bwysig neu’n cyflawni trosedd yn yr ysgol.
  
• Ystyrir y penderfyniad i wahardd disgybl yn ddifrifol iawn, ac fel rheol, dim ond pan fetho popeth arall y gwneir hyn, pan fyddai caniatáu i’r disgybl aros yn yr ysgol yn peri niwed difrifol i addysg neu les y disgybl neu eraill yn yr ysgol.
  
• Er bod rhai pobl yn credu bod cael eu gorchymyn i beidio â mynychu’8 r ysgol yn gwireddu breuddwyd, mewn gwirionedd, mae gwahardd yn rhywbeth difrifol iawn i gael ar eich cofnod.
  
• Gallai cael eich gwahardd olygu eich bod ar eich colled o ran eich addysg, a gallai gyfrif yn eich erbyn os fyddwch chi’n ceisio am swydd neu gwrs yn rhywle arall yn y dyfodol.
  

Mae yna ddau fath o waharddiad

• Tymor sefydlog - pan fydd disgybl yn cael ei wahardd rhag mynychu’r ysgol am gyfnod penodol. Gallai hyn olygu diwrnodau penodol o’r wythnos neu nifer penodol o ddyddiau, wythnosau neu fisoedd. Ni ddylai cyfanswm cyfnod y gwaharddiadau sefydlog fod yn fwy na 45 diwrnod ysgol mewn blwyddyn ysgol.
  
• Parhaol - pan fydd disgybl yn cael ei wahardd rhag mynychu’r ysgol honno byth eto.
  

Mae yna restr safonol cenedlaethol o resymau dros wahardd, sy’n cynnwys:
ymosodiad corfforol

• sarhad ar lafar
  
• bwlio
  
• sarhad hiliol
  
• camymddwyn rhywiol
  
• camddefnyddio cyffuriau, alcohol neu sylweddau
  
• difrodi
  
• lladrata
  
• camymddwyn neu dorri rheolau’r ysgol yn barhaus
  
• nid yw achosion unigol o chwarae triwant, anghofio gwaith cartref, gwisgo gemwaith neu dorri rheolau gwisg ysgol yn resymau dros wahardd.
  

Beth sy’n digwydd os cewch chi’ch gwahardd?

• Mae canllawiau’r Llywodraeth yn nodi’r hyn ddylai ddigwydd pan fydd rhywun yn cael ei wahardd.
  
• Rhaid i’r Pennaeth gynnal ymchwiliad llawn o’r digwyddiad sydd wedi arwain at waharddiad.
  
• Rhaid rhoi gwybod i’ch rhieni neu’ch gofalwr yn syth.
  
• Dylai’ch rhieni neu’ch gofalwr gael llythyr oddi wrth y Pennaeth yn egluro’r rhesymau dros wahardd, p’un a yw’n barhaol neu am ba hyd y bydd yn para a sut y gallan nhw apelio yn ei erbyn os ydyn nhw’n teimlo bod y gwaharddiad yn anghyfiawn.
  
• Wrth apelio, gall llywodraethwyr yr ysgol gymeradwyo’r gwaharddiad neu orchymyn y gallwch chi ailfynychu’r ysgol.
  
• Gellir apelio ymhellach i banel lleol.
  
• Mae’n bwysig apelio cyn gynted â phosib ac o fewn yr amser a nodir yn y llythyr.
  
• Mae hefyd gan ddisgyblion 11 oed ac yn hŷn yr hawl i apelio yn erbyn gwaharddiad.
• Mae gan bob disgybl sydd wedi’i wahardd yr hawl i leisio barn i Bwyllgor Disgyblu Disgyblion y Corff Llywodraethu a gwrandawiadau’r Panel Apelio Annibynnol. Gall hyn fod ar lafar, yn ysgrifenedig, neu mewn unrhyw fformat ymarferol arall.
• Mae’r dogfennau arweiniad cyfredol yn datgan bod gan y disgybl a’i rieni yr hawl i fynychu gwrandawiad y Panel Apelio Annibynnol a chyflwyno’u hachos, naill ai’n ysgrifenedig neu ar lafar.

Rhagor o wybodaeth a chyngor

• Mae’r Ganolfan Gynghori ar Addysg yn cynnig cyngor dros y ffôn ar waharddiadau o ddydd Llun i ddydd Gwener 2.00pm - 5.00pm Ffôn: 0808 800 0327 www.ace-ed.org.uk. Mae llyfryn dwyieithog "Dweud eich dweud " Canllaw person ifanc i waharddiadau, ar gael gan ACE fel copi caled neu i’w lawrlwytho o’r wefan.
• Mae canllawiau llawn Llywodraeth Cynulliad Cymru ar waharddiadau yng Nghylchlythyr Rhif. 001/2004 Gwahardd o Ysgolion ac Unedau Cyfeirio Disgyblion, sydd ar gael yn http://wales.gov.uk